JAPAN RAM THU TAWITE

 By    Ro Khar Thang (Rtd)

A nupi le a fa nu thawn

THUHMAI:

A liam zo mi kum- 9 hrawng (AD- 2002) kumah Japan ram ih (ARI) Asian Rural Institute ah Rural Development Course thlakua (9) sung ka va kai hnu ah, Negro Islands, Philipnes ah thlakhat le hrek sung kan training nak cu kan va peh bet salih cui sin Japan ah ka kir sal. Ka hmuhton mi tampi sung ihsin thudang tel hrih loin tui tum ahcun Japan ram thu tlangpi lawng  tawitakten ka rawn ngan ve duak ih siartu hrangah a tangkai ve tho ka beisei.

A UMNAK:

Asia nisuahnak ram kulh sungih tel mi Japan ram hi Pacific Ocean,  Sea of Japan, Sea of Philipine, Sea of East China le Sea of Okhotsk pawlin a kulh theh. Nitlaknak lamah kan zoh asile South Korea le North Korea, Saklam ah Russia, Nitlaknak thlanglam ah China le Taiwan ram pawl cu a ram inhnen nai bik an si.

Cetzung hnatuannak lamah a thangso zet mi Japan ram sungah tikulh leilung fate te 6,000 hrawng an um. Minung ih an luah (um) nak tikulh  cu 300 hrawng lawng a si. A thupi bik tikulh leilung pali(4) pawl cu, Hokkaido, Honshu,Shikoku le Kyushu pawl  an si-ih saklam ihsin thlanglam ah a tlar  tlarten an dotaw zelzi.

NIPPON:

Japan ram hmin hi anmah Japan minung pawl cun Nippon, Nihon lole Hinomoto ti’n an ko. 1970 kumah Japan Acozah cun a ram hmin dingah NIPPON ti-ih kawh ciau dingah official ih thu a than hnu ihsin, anmah Japan pawl cun an ram cu NIPPON ti hlirin an ko. A sullam cu, “Ni hmu hmaisa bik ram” tinak a si. Tuluk (Chinese) pawlih sim dan ahcun Japan ram cu ni suahnak lam bikih a um ruangah cui hmin cu a rawngsuak a si an ti theu.

TLANG (YAMA) :

Japan ram pumpi ih 70 percent cu tlangram hlir a si ih, 30 percent cu tlangmual  rawn tete hlir a si. Meisa tlang tampi umnak Japan ram ih a sangbik mi le a mawi bik mi tlang cu FUJI SAN a si ih  meter 3776 ( pi -12385) a sang. SHIZUOKA le YAMANASHI township karlak ah a umih a tlang hram cu tili in a kulh. Tlang niam bik cu TEN BO  SAN a si ih meter 4.53 lawng a si. Osaka ramthen sungah a um.

TIVA ( KAWA) :

Japan ram ih an tiva sau bik cu Nagano le Niigata ramthen sungah a luang tlang mi Shinano Gawa a si ih  meter 367 a sau. Tiva tawi bik cu Okinawa  tikulh ih  Shiokawa a si ih meter 300 hrawng a si.

Tili(Diil) MIZUUMI :

Japan ram ih an tili(rihli) tum bik cu Shiga ramthen laifang hrawngih um mi Biwako (km. 670.3) kau mi a si ih rihli fate bik cu Yamagata ramthen sungih um Hakuryo a si ih (km. 0.60) te lawng a si.

TIKULH (SHIMA) :

Japan ramih tikulh tum bik cu Hokkado  ih um mi Etorofutu (3182.7 km) a si ih, tikulh fate bik cu Tokyo ih um mi Okinotori tikulh a si.

LEIHNUAI TLANGLENG ZIN (TONNERU):

Mirang tong ih (tunnel) ti mi hi Japan pawl cun (tonneru) tin an sal thiam dan a si. Japan pan sungih a sau bik mi leihnuai tlangleng zin cu SENKAN TUNNEL a si ih, 53. 85 km a kim. Hokkaido le Aomori ramthen pehzomnak zinpi bik a si ih, kum 1985 ihsin an hmang thok. ( Hi mi tunnel cu leilung tlun pumpi ih  leihnuai tlangleng zin) sau bik khal a si. Cun Japan ram sungih a tum bik mi leihnuai tlangleng zinpi cu GUNMA le NIIGATA ramthen pehtlaih awknak bik, Kannetsu Tunnel a si ih, (km .11.055) kau mi a si.

LINGHNIN ( JISHIN) :

Japan ram cu linghnin tamnak ram a sivekin (theih tham le theihtham lo mi linghnin) ti in, kumkhat sungah vei 500 ihsin ve 1000 tluk a hnin theu. Curuangah theihcia lo mi linghnin a um tikih, kilhimawknak ding dan tete, TV program ah zirhnak an tuahsak theu.

FAIZONG PAR (SAKURA) :

Japan pawlin thupi bikih an ret mi pangpar cu Faizong par (Sakura) a si ih, a tlangpi thu ah March thla cem zawng April thla laifang tiang hrawng lawng a par theu ruangah, Faizong a par caan ahcun Faizong kung hnuaiah in-ei khawm le nomawk tlangnak caan an hmang theu. Cumi cu HANAMI (Pangpar zoh ih fehkhawm) an tinak a si ih, faizong kung hnuai ahcun rawl an tawmaw khawm, Karaoke an sak, thlungdar phunkim tumin an lam, an turpakaak ciamco theu. Rawl ei ding keng ci lo pawl hrangah khal a kiangkap thlamte hnuaiah (hi tikcu lawngih an phuan mi) mah duhduh lei ding zuartu tampi an tlaraw thliangthliang. Cumi HANAMI cu sun vang lai lawngah si loin zanthim hnu khalah mei vang tleu hemhem pin an  tuahih zanvar  ten faizong par mawinak, mei eng mawinak le mah le mawi ti zawng zawng zohawk rero nak caan a si ih, vanram note, lei tlafual a si bik mai.Mual in liam san zotu Saing Thisaing ih hla bang khin, “Suahsempi, ci le kuang tiang hman hngilh thluh” pang nak a si bik.

THANTAR (KOKKI) :

Japan Thantar (Alaan) cu kan hmuh theu vekin Puanvar parah a sen hluum(bial vengveng) a si kha. Hiti ih puan var laifangih a sen hluum  an ret mi sullam cu, “Japan ram hi leilung tlun pumpi ih hmun thupi bik a si” an tinak a si.

RAM HLAPI (KOKKA) ;

Japan ram hlapi National Anthame cu  a sullam thei thluh cuang loin hitin kan by-heart (thiam) ve men.  Kimigayowa,  Chio ni chiyo  ni  yachi  yoni;

                            Sazare  ishino,  Iwaoto  narite,

                             Kokeno  Musumade-   an ti.

NI LE KHUA UMDAN (Climate) :

Sak le thlang Km 3000 ih sau mi Japan ram sungah Tikcu umdan phunli a nei. Nikhaw nom  thaalcaan (Haru) Khawhlum le ruahsur caan (Natsu) an timi thaal caan,  A dai deuh ih (Taifu) ti mi thlisia tlun caan (Aki) thlatang le  A daihbik le a car zet tikcu (Fuyu) ti mi thla tang tla an si.

HARU (Thaalcaan) : March ihsin May thla tiang a huapih a hlum nan nikhaw nom caan a si ih, umtlan dan a nuam thei zet. Final  Examination theh tikcu  February thla laifang ihsin march cem tiang tlawngpih pii caan (Haru Yasumi) an ti. Tlawngta le hnatuantu pawlih colhkhuan ni rei an

Hman caan a si ruangah vanzamleng le tlangleng ticket man pawl a kaisan laifang tikcu a si theu. April ahcun tlawng on sal caan a si ih, hnatuantu pawl khal an hna ih an luhsal caan a si ruangah,’pakhat khat ka tuah ding timi lunput an neih laifang caan’ an ti.  April thla thok ahcun faizong  an par ruangah, pangpar zoh, nunnom puai tuah, reilote a par mi faizong kung hnuai ih zu in, rawl ei, leknak tuah, Karaoke hlasak thawm thawn a hlunghlai celcel.

Tikcu thlengawk caan a si vekin “allergy” pakhat khat um caan ( rim huat mi/ duh lo zawng) a si mi ‘Kafunsho’ tikcu caan an ti ih kafunsho tuartu pawlih hrang  ahcun thinnom lo caan khal a si.

NATSU (Than tikcu): June ihsin August karlak  thaalcaan a si ih, kumkhat sungih a sat bik caan a si. July thlacem zawng ihsin August thla laifang tiang cu tifinriat kap (Umi) ih feh tikcu a si ih, tidai leuh, Hanabi an ti ih meisa parmawi taktak van lamah an kap, Cuvek meisa parmawi nasazet ih an kahnak hmunpi Yukata an timi ahcun Japan Kimono an hrukih thlanzapnak mawite kengin an feh, a tikcu cam ih thingthei thar, donfawh tivek, ice cream siseh, So’men an ti mi(Japan pe nganpiayi le vur khal) thawi tuah mi Japan Mouhinkha tivek ei in caan a si.

June thla cun ruah a sur phahphah nan a hlum dan cu 40 c a thleng theu. August thla Cu O Bun an ti ih mithi zo pawl upat peknak thla a si. Cumi upat peknak puai hrangah ni 4-5 tiang hnatuan an cawl theu. Tlawng khal an pit ruangah khualtlawnnak tikcu ah an hmang nasa.

Thaal tlawngpit canah cun Japan ramsung ih khual tlawnnak ding ahcun (Ju Hachi Kippu) an ti ih a nuam tuk lemlo nan tlangleng ticket pawl man olte ih an zuar caan a si.

THLATANG (Aki):  September ihsin November thla tiang umtlan dan nomcaan, thlatan tikcu a si ih, ‘Rawl ei kathawt caan’, ‘Ca siar duh tikcu’,   ‘Leknak tikcu’ an ti. September thla ah Taifu an ti mi, thlisia a hrang theu. October thla a thlen cun thinghnah hring hmuahhmuah cu a sen lole a eng mawi zet ah an cang thluh ih zoh an mawi zet. Zan ah khal Tsuki Mi an ti ih thlapi thul lai mawi zet hnuaiah an cawl huahhi ve theu.

THLATANG (Fuyu) : December ihsin February tiang hi a daih laifang thlatang caan a si. Vur nasa zet ih a tlak theu ruangah thlatang caan ih an lek zuamawknak bik vur khal par ih tolh le tlan zuamawknak a phunphun tuah dingah an suak celcel theu. Hi tikcu caan ah sungkhat rualpi tha sawmaw in hmunkhat ah Nabe an ti mi hotpot an eikhawm, Kotatsu an ti mi tonak le keretnak electric thaw ih an hlum ter mi hmun ih rawl eikhawm tivek, Bo Nin Kai an ti mi kumcem ‘Year- End- Party’ rawlei khawmnak tuah in an nuamaw thei ngaingai.

Tikcu caan a thlengawk vekin a tikcu thawn milaw mi hnipuan hruk, a tikcu zir zir ih in ei tuah le ei, A tikcu caan te ih parsuak mi pangpar zoh dingih fehkhawm ti pawl hi an uar zetih thil thar le mawi ngaina /duh zettu Japan pawl cun ziangtluk ih an in ei hawlnak a tlak niam khal le nunnuam aipuang ten an suakvak thotho.

Tikcu nei ih a par suak mi pangpar lak ihsin Sakura (faizong), Tsutsuji an ti mi sokhlei par, Shobu ti mi lili par, Aijisai an ti mi thlaruk par, Himawari an ti mi Nihawi par, Asagao an ti mi kawlhra par, thlatang caan ih par theu Kosumosu an ti mi (Seinpaan), Momiji an ti mi hnahmawi pawl, Ume an ti mi Tuluk sunhlu par le Momo an ti mi pangpar pawl cu mi tampi in an duh le an uar bik mi an si.