KHRIHAH SERSIAMTHAR KAN SI.

2 Korin 5: 17 ih a sim vekin Zo khal Khrih ih a um cun sersiam thar a si;

a hlun cu a cem ih a thar a si! Hi “thar” ti mi thu ah Greek tong in phunhnih in Bible ah simfiang a si. A pakhat nak cu neos ti a siih cu mi cu thil hrekkhat tuah rero lai mi a sim duh, a sinan cunah cun theh cia zo mi khal a rak um ve thotho. Hi tawk cang ih “Thar” ti mi in a sim duh tak cu kainos ti mi a si ih cucu theh fel thluh zo mi zianghman tuahtul um nawn lo khi a rel duhmi a si. Khrihah kan nih cu sersiamthar mi kan si, Pathian in lei le van a sersiam lai khal ah zianghman lo ihsin a tuah, cu vek thotho in kan nih khal in tuah. A hlun rem khaw men in a thianhlim men a silo, a thar rori in in rak tuah mi kan si. Jesuh Krih ih kan um tikah Pathian ih sinnak kan nei ngah (co ngah) 2Pter 1:4 KJV ah Pathian rori kha thlarau minung (person) a si nak thawn kan sungah rungnung in a khawsa. Cu ruangah kan nih cu Khrih sungah kan um ih a nih tla kan sungah a um. (2Korin. 5:17).

Khih ah suaksal, tuahthar sal lole hrin thar kan si. Hi hrinthar ti mi hi thlarau lam thinlung a si. A hluntu sawn cu tisa thinlung a si. Nunthar sawn cun Pathian ih thu a awiih Pathian duhnak a thlunih a hnatuannak hrangah a nun a hlan. Hi nunthar neitu cun nunhlun duhzawng an tuah thei nawn lo ih tuah duhnak thinlung khal a hlo vivo.   Nunhlun cu thlarau lam thuah  thi a si zo ruangah a mah ten a nung thei nawn lo. Hi mi hi sual leiba ruangih thi a si (Eph. 2:1). Cui thihnak lak ihsi tinun ih kan um theinak dingah mai in cencilh ih a mah Khrih ih kan um hnu lawngah nung thei kan si. Khrih Jesuh cun a thianghlim mi nunthar le a siattheilo mi nun in pe. Kan nunhlun cu Pathian hmuh cun sual ruangah cross par a thi a siih,  Phum ih kan um hnuah kaih thawhsal in kan um, cucu a mah thawi nun tharih kan lentlang nak dingah a si. (Rom 6:4).

Khrihsung ah ziangtin kan um ding? ti thusuhnak kan tawng theu ih, a tlunih kan tarlang zo vekin mahih va um tul loin a ciaah kan um a si sawn. Ziangah ti le (1 Korin 1: 30 KJV) ah cun nan nih cu a mai zarah Khrih sungah nan um zo in ti. In um tir dan takcu Pathian in a fapa thih rualah thi in in ruat ih a nunnak ah nung zo in in ruat. 2Kor. 5:14 ah khan fiangten a sim. In rak peh zawm lai kan thei lo nan tui a thutak thu a Thlarau Thianghlim in, in theih ter ciah khin, hi leitlun kan um lai ah Pathian fa kan si zo nak kan thei aw fiangih, cun tin A thlarau thianghlim khal amahkhan nak ah kan sungah a nun ter cih. Eph. 1:13-15. Mah te va um, va lut, va zum si sawn lo in kan sung ah thlarau thianghlim in in sim ih in cencilh khan kan si nak kan fiang ih, Pathiuan fate kan si zia a fiang. Cutin Pathian cu ka Pa ka Pa tin kan ko ve thei thlang Rom. 8:14-16.Cutin kan thlarau le Pathian tharau a peh zawm aw ih Pathian fa te ka si zia a fiang ter. Kan hung si a si lo ih, kan si zonak hi Thlarau hin fiangten in theihter a si. Cutin kan theih hlanpi ah Khrihah sersiam thar mi kan rak si zo.  Pathian sunglawi seh.