Ziangtin Ka nupi duhzet Za Nei Kai thawn?

Run insang nuam Khristian insang dinpi tu dingih Pathian ih I pek mi ka thai nu

Amos Thang le a nupi duhtak
Mai Run Inn sitting room ah

Za Nei Kai hi Rev. Khaw Tin San Hnahthial khua le Thipcang khua ih Pi Tha Kip Men tei fanu pa hnihnak a siih kum 1968 ah Old Hnahthial khua ah a suak. Unau pianpi nu nau pa khat Hlawn Nei Par, le mipa pathum Mr. Za Kap Sawn, Rev. Fung Nei Mang, le Mr. Lal Lian Khum a nei.

Kan theih awk hram thawk nak

Kan nauhak lai te in Kohhran pakhat E.F.C ah kan rak um ih cui sin khawmpi zawh vek ah Pastor insang ti cu kan thei aw. Cun a nui nau Pi Sen Kip Sung hi ka U Lal San Hnagak ih nupi a si ih, ka U tei In in Zongte tlawngah tlawng a hung kai ih cu nah sung le khat vekih um cu kan thei aw sinsin. Ka nupi dng ih Pathian ruat ti ka theih hlan ihsin ka hmuh ih piang in duhdawtnak thuk zet kei mah ah a um cia zo. Cu cu nupi neih ding thu ka ruah thiam hlanah asi. A falat lai ah dam hmu tuk lo a si ih ka zangfah sinsin. Cun sin kan thanglian vivo ih Falam ah puanthit zir in a um ih cu khal ah ka U Hngak tei in thotho ah a um. Cui hnu ah kum 1989 ah Far Eastern Fundamental School of Theology, Falam U Mang Bur ih in ah Bible tlawng kan kai tlang. Cucu 1988 Kawl ram tlawngta sandah piah buai ruangah FEFST (EPC) tlawng kha Inseine, Yangon ah phuan thei nawn lo in Falam ah thlathum an kai lawk sungte a si. Cui hnu ah kei in India Bangalore BBBC ah ka kai san. Khai tum ih sin nupi ding hril thinlung ka nei deuh ih, ka thinlungah a um zo. India ah tlawng kumhnih ka kai hnuah FEFST Inseine, Yangon ah ka rung peh sal ih hmunkhat te ah tlawng kan kai tlang.

Nupi ding ih ka hrilnak san

Kei hi ka Inn sang (back ground) ka nu le ka pa hi lei dan ih unau nei hnihthum lo tak, lai dan ih mifarah, ka pa in ka farah hi thingpar ah ka rah lo fangfang an rak ti vek deuh thaw ka si in rak ti theu ih, Pathian duhdawtnak ruangah ka Pa le ka nu in Pathian rori a rian ih an thlacamnak zarah Pathian in mal a sawm ih Unau hra te in hun nei, kan unau lak in mi pali fulltime rawngbawltu Pathian in in ko suak. Mi hmuhdan cun nun nuam ei le in khal harsa lo ah in ruat ding ih kan nih le nunhar te ih rawngbawl kan si ruaangah nupi dingah kan insang thei fiang lo tu ka neih le, ka Pathian hnatuannak ah harsatnak tampi a tuar thei lo pang ding ti ka phang ih, Piangthar si nun duhnung si ka thinlung luahkhat tubik ka insang dinpi tu ding Kaite  hi ka duhbik ih ka hril mi a si.  Bible tlawng B.Th ka theh a nih in G.Th a theh ve ih cutin Rev. Tial Kulh ih kut sihnak in Hnahthial khawthar apa Rev. khaw Tin San ih pastor tuan lai rero nak Biak Inn ah  kum 1993 March 21 ah kan nei aw a si.  

Insang kan din hnu ah

Harsatnak tam pi ei in le sum le pai lamah ram a harsat vekin kan tawng ngaingai ih, Bawipai pekmi ka nupi hin vawikhat hman sum le pai kan harsat ruang ih I demnak aw le patling lo vek ih I ruatnak tawng kam a tong ka thei dah lo. Cuhnak in Pathian hnenih thlacamnak thawn kan si dan tawktawk in Pathian hnatuan in Crusade vekih ka vah hlohsan khal le insangah a theitawk in tan a la ih, ka rawngbawlnak bawmtu tha bikah a rung cang ta riai. Fim le at thu khal ah ngaithiam awk tul mi hmuahhmuah Pathian hmin in ngaidamawk theinak Pathian in in pe tawn. Ril ih rah rosunglawi Pathian in fapa pa thum in pe ih, a upa bik Obadiah Van Aye Thang a sangtu Ray Van Thawng Thang a nau ta bik Van Lawm Thang tla an si. Cui hnu ah kan nu cu vansiat ah nau in dam lo in a umih kum 2007 ah a nau in Agape sizungah operation kan tuah. Nau nei thei nawn lo ding fa nu lo in kan um ding kan ti rero lai ah Presbyterian Baby home in Pathian hmin ih an fa cawm mi kum 18 kim nu le pa an hawlsak thu in rung sim ih cu laifang cu Rev. Ro Khar Thang in Home manager a tuan lai fang a si. Insang pa li in kan dil (sio) ih Kohhran duhsak co in fa nu Lal Tha Kim (Ma Kim) hi Pathian in in pe ih tu ahcun fapa pa thum le fa nu pa khat te kan nei. Cu tin ih insang nuam zetih in din ih, in kil khawitu hi hmuh theih lo Pathian cat loih in um pi tu hi a si.

Insang dinhnuih ka uar zetmi a mi zia

1.     Kan insang hi ka nupa ka pa ka sungkhat hmuahhmuah hi a mai pianpi tluk in a ruat thei in ka thei. (Mo mikhual an rel mi vek a si lo)

2.     A mai tawngkam ruangah kan unau le kan sungkhat tawhawk buainak kan nei hrih lo in ka thei. (Hi thuah cun ka nu le pa sungkhat unau khal in insang kan neih hnuah zohman Rukruk puh awk le Uiret puhawk pang a um lo ah cun kan hnaihnawk aw dah lo ding ti hi, ka pai thucah le in zirh dan khal a si ih kan farnu pawl khal pasal nan nei ceng a si le rukruk le uiret vek an lo puh pang a si lo ahcun thu te nau men ka hnen nan thlen lo pei  ti a cah ringring theu. Buainak cu hmun khatkhat ihsin a suak thei ringring mi asi nan khui hman in kan karlak ah thubuai um hrih lo in tu tiangah zankhat te thenawk pang/ thinse hlonih thenawk pang hman kan nei hrih lo hi Pathian zangfahnak a si).

3.     In a hlum ringring ih Fale tlawng a tum can ih piang a hmuak in rawl a pe ringring in insang a uap hlum.

4.     A mah hi mi zakzum a ngaitlawm awk hi ngaitlawm awknak sual a si lo sawm ti ding khawp in a um nan a zir vivo ih, tu ah cun Kohhran khal ah a thei tawk in nu bu lamah Secretary ti vek le tawngtai khawl khalah lang hngan zet in tel in, Biak Inn pangpar (thut) cei mawi lam tla a zir vivo ih taima zet in ka rangbawlnak tin a ruat thei hi ka lung awi zet. Pathian in ral thatnak pe ih mi hmai khalah Bawipa zahpi lo in a din thei ruangah hi vek ih lam ruaitu Bawipa khal ka thangthat.

5.     Khui hmun ka then khalah ka rinsan nak le ka duhdawtnak cu a hmun ringirng.

6.     Ka um lo sungah Kohhran mi pawl hnen in thusia lam ka hnenah a thlen dah lo ih, a tha zawng (positive) ih mi ka hmuh theinak dingih bawmtu tha Pathian ih I pek mi rori a si tin ka ruat.

7.     Sum le pai a kilkawi tha in a ui thei zet a tultuk rori lawng ih hman hi a tannak a si ringring.

8.     Fa le pawl an cut hlanah ngaizawng nei in ca an zir thei lo ding ti a phang zet ih thei tawk in a kil veng.

9.     Fa le enkawl nakah le nun simnak ah mawi lo deuh ka tawng pang hmanah fa lei theihah I mawhthluk lo kan tangtlang ringring ih lehhnuah kan sim aw leh men.

10.              Kan fa le an than len ve ten mah te pa lo ih harsa tuar hril sawn in Bible tlawng kai sal ding hi tha nasa takin I petu a si ih ka lungawi taktak.

Nutling sawn siarcawk lo an um ko ding nan, kei ka hrangih Pathian ih in pek mi rawngbawlpi ding le Khristian insang dintlang dingih I pek mi parah hin ka lung a kim in, ka lungawi tuk, hi lungawinak hi milai ih relsuah thiam lo tiang a si . I hrilsaktu le I petu Pathian sunglawihnak ah cang vivo hram seh. Co tawkte ih lungawi theinak le Pathian rawngbawl thei vivo nak dingah uan awknak sual, duhamnak sual, Pathian mitlung lomi sualnak phunphun thei thiamih kan hrialsan thei ding ah Bawipan kan mit in vang ter vivo hram seh. Cun kan parih thiltha kan phu lo malsawm in pe ih insang nuam in dinsuaktu Pathian lawng hi a pakhatnak (center) a si ti kan theih vivo theinak ding hi ka thlacamnak a si. Insang nuam hi sum le pai le lennak, neih nunnak ih lei thei mi a si lo ih Bwipa ah a thum aw sawn a si.