LIAMCIA RUAT LE LUNG A LENG hMAI LAM RUAT LE THIN A PIT, TU HI ZIANG TIN?

Dunglam, Hmailam, Tuini Khawruahnak

New Delhi Indian gate kiangah

Pi Pu thufim “Dunglam thu ruat le lung a leng. Hmailam thu ruat le thin a pit. Tuisun ih kan dinhmunih lungawi theitu si a tha bik,” an rak ti. Hi thu hi a thatuk Pathian thuthaw khalin a mil aw (a kaih a) Cun "Dunglam Zubui mei can hmailam sausawn an rak ti" Ziangtin dunglam kan ruat kei ziang tin hmai lam hrang ah khua kan khang ding ti malten zohtlang hnih seh la.

A lungleng zawng ih dunglam thu ruahnak

Dunglam thu kan ruat tikah a liam zomi tleicia pawl thawi nuntu khawsaknak ruat cun lung hi a leng lo thei lo. Zunngai in thlamual ka liam ding ti ah Pi Pu pawl in an rak ti theu tho ih an mawh lio nasa kum ziangzat ta khal kan thencia mi pawl thu hla ruat hi cun lunglen a reh thei dah lo. Rual le pi khukthi hawi pawl thu hla kan ruah khal le lung a leng tho tho. Cun a liamcia ih ningzahnak kan tawnmi ruat le tha a nau thei tuk ih, zianghman hlawhtlinnak khal um thei nawn lo ding vek in thin a har tir fawn si. a thatnak Zubui mei cante lawng ruat a tha. Zubui mei can cu thutha kan parih mi thatnak, Pathian ih thatnak, le cawn tlak nun kan hmuhmi pawl hngilh lo ding lawng a si.

Thinpit zawng ih hmailam ruahnak

Hmailam thu ruah khal hi a selam thil rung thleng ding ruah cun thin a pit thei tuk, ka tar vivo ih nikhat hnu nikhat in ka thih ni ka naih ti thei si, thih hnangamnak nei lo hrangah phei cun thin a pit law law, Mi cu an fa le an pitling a si lo ah sumzin an nei kan nih kan fa le a pitling vivo le ziangtin ha ka ti ding tivek a dangdang hun ruat hi cun thin a pit curco thei ngai.

Nehtu Jesuh thawi hmailam hrang khawkhannak

Kan nun neitu theifiangtui hrangah cun hmuhthiamlo lungawinak cu a rak um ve ko, Co hrihlo neihrihlo pawl in hmailam hrangah hremhmun ihsin luatnak le sisi nitin nun lam in hruaitu le incawm tu hngangamnak in petu hi, A thuthangtha ngainak ih sin co theih a si ti thei cio uh si law. Hmailam thuah hin Bawipai duhzawng ziang a si ti ruat thiam a pawimawh zet, Pi pu tongih "hmailam sausawn" timi kha tumtahnak nasa tak neih a tul zia a lang ter. A mah lawng te Bawipa tel lo ih khawkhan nak cun rei a daih lo. James ih in sim bang in "Bawipai rem a ti le cutin kha tin ka ti ding" tiih khawkhangtu pawl cu an rinsanmi Bawipa in hlawhtlinnak a pe a si. A thinpit zawng in hmailam thu ruat lo in nehtu Jesuh ih nehnak thawn khuakhaang tlang uh si.

Nitin nunih lungawitu mi thlawsuak hleice

Nitin nun ih kan co tawk Bawipai rem in ti sak mi lawng kan hnen ah a thleng ih, cumi si lo Bawipai duh lo zawngih kan laklut mi sum pawl hi kan innsang hrangah a tha bik lo ti theithiam tui hrang ahcun kan hmai lam hrang khal ruah har ding le thin pih nak ding a um nawn lo. Jesuh mizan tui sun kumkhua ih a hmunmi (Heb. 13:8) in a hram in thawhsak vekin a tawptiang in hruai ding ti thei in Pathian thangthatnak in an can an hmang theu. Jesuh kan neih hnak ih thlawsuah tum le ropi a um lo. Haleluijah Bawipai hmin thangthat si ko seh.