Pastor pawlin an hnatuan tuanten an bansannak thu pa hra

(10 Real Reasons Pastors Quit Too Soon)

by Tim Peters (www.churchleaders.com)

 Tim Peters in cahram a nganmi hi zumtu pawlin fimkhur zetin zohfiah le zir awknak tha zet asi.

Nangteh na umnak kawhhran pastor pawl phurrit maw na si, bawmtu tha na si, na umnak kawhhran pastor in a hnuailam thu pawl hi a hmuhtawnmi le tuar rero tla asi pang maw, ziangtin pastor pawl Pathian fialmi hnatuan an tuansuak famkim thei ding ti ruahnak in petu dingah American ramah thlakhat sungah pastor 1700 hnakih tamin an hnatuan an cawlhsannak thu hrampi pawl zoh hnik uhsi.

 Hminsin: “Theihtha” timi pawl hi betmi an si.

Thlatinte pastor 1,700 lenglo in an hnatuan an cawlhsan. Kumkhat sungah kawhhran thar 4,000 tluk din asi ih kawhhran (biak inn) 7000 tlukkhar asi. Ziangthu ruangah pastor tampi in an hnatuan tuanten an cawlhsan, ziangruangah biak inn 7000 kumtin khar asi? America ramih biak inn 100,000 tluk cu an thi cuahco, kum rei lo te ah khar an si ding (Thomas S. Rainer). A hnuai lam pawl hi thu tlangpi khaikhawm, Pastor pawl hmuhtawnmi lakkhawm mi ihsin ngansuah mi asi. Pastor pawl an hnatuan an cawlhsannak thu pawl tla cu a thlangpi thu in a hnuailam vekin asi.

1.     Thanau nak (Discouragement).

            Pastor tuanlai pawl khalin Pastor 100 ah 50 (50%) tluk cu an hnatuan hi cang thei sehla suahsan, cawlhsan an duh ringring ti asi. Sawiselnak hi a tam tuk ih bawmtu, lawmtu, a mal tuk. Pastor pakhat in voi 15 sawiselnak a tawn canah voi 1 tluk lawng lawmnak a tawng. Pastor lawmnak cu a ziamral lohli nan an sawiselnak cu a tang ringring. Cutin sawiselnak tawm lakah kawhhran member pawl khawm paih nawn loin biak inn a lawng vivo tikah pastor tampi in anmah riangri an hnatuan an cawlhsan theu.

 Theihtha:

Pastor:Ziangvek sawiselnak na tawng tla le an lo sawiselnak ih lethra in na tuahmi a tha sawn ringring asi.

Mipi: Thlarau rawl a lo cawm rero tu, rawl a lo barh rerotu ih kut cu na keu rero ding maw? Na pastor pa na bawm tikah, milai na bawm si loin Pathian na duhdawtnak, na tihzahnak na langter mi asi.

An palh theu (Failure)

100 ah 70 (70%) pastor pawl hi pastor an tuan thawk hnakin an tuan hnu ah anmah le anmah hi an thiam aw lo, hlawhtling lo ah an ruat awaw. Pastor dang, kawhhran dang pawl thawn an khaikhawm theu tikah an beidawng theu.  

Theihtha:

Pastor: Tahthim awknak in a suahpi theu mi thil pahnih cu i) Midang hnakin ka thacuang tiah porh awknak, ii) asilole, midang tluk in ka hlawhtling lo, ka tling lo tiah mahlemah namthlak awknak asi.

Mipi: Pastor pawl hi minung ih hnatuan pekmi an silo. Pathian kawhnak vekin Pathian hnatuan fial mi an si. Pastor pakhat le pakhat tahthim theih an silo. Anmah le hnatuan Pathian kawhnak a dang cio.  

3.     A fal in um (Loneliness)

            100 ah 70 (70%) pastor pawl in rualpi tha zet tiah an kawh theih mi rualpi nei lo lawnglawng an si. Mi tampi in pastor hnenah bawmnak an dil nan pastor pa hrangah rualpi tha ti thei ding minung an um lo theu. Pastor pawl cu milai an si vekin harsatnak an nei ve. Cui an harsatnak pawl theihpitu ding khawpi rinsan mi rualpi tha an nei lo theu.

 Theihtha:

Pastor: Milai zohman famkim kan um lo vekin pastor khal a famkim lo. Cutin famkim lonak cio cu zalen zetin kawhhran member pawl hnenah pholang ngam ding asi. Cutin kawhhran tuanrel upa pawl le sungtel pawl lak ihsin siseh pawnlam ihsin siseh rualpitha, Khrih ah unau vekin nunpi zir ding asi.

Mipi: Pastor pawl hnenah sawiselnak le bawmnak lawng hawl loin pastor pa hnenah bawmtu tha, rualpi tha si zuam cio sawn ding kan si.  

4.     Fellonak (Moral Failure)

            100 ah 33 (33%) pastor pawlin nunau mipa pehtlaihnak ah an fel lo thu an sim suak. Pastor pawl (nunau mipa thu) fel lonak cu zumtu menmen fel lonak hnakin tampi a siatsuah sawn theu asi. Nunau mipa lam fel lonak hrial thei dingin lamzin pakhatkhat tuah a tha. A falin nunau thawn (pastor nu hrangah, mipa thawn) tikcu hmang dah lo ding, fala le tlangval vekin biak sawn aw dah lo ding, fala lole tlangval (opposite sex) thawn tawn awk tikah nupi/pasal theihpi ringring a tha. Computer ah siseh video ah siseh pastor le rawngbawltu zumtu hrimhrim in nunau mipa sualnak zuk (nung) pawl zoh hrimhrim lo ding asi. Computer neihmi pawl tla (zuk tha lo) zoh theih lo in tuah theh ding asi.

 Theihtha:

Pastor: Nunau (opposite sex) thawn afal in tikcu hmang tlanglo a tha. Lairam ah an hman theu mi taksa nam ter, hmetter tivek hman lo a tha. Thlacam ding khalah a fal in room sungah thlacam tlang lo a tha. Fimkhur ten dinhmun hrial ringring thei a tha.

Mipi: Pastor cu milai asi vekin a falten pastor pa thawn um tlang ding beisei lo a tha (pastor pa ih opposite agenda in).  

5.     Sumpai harsatnak (Financial Pressure)

            100 ah 70 (70%) pawlin an hlawh ding zat an hlawh lo asi tiah an ruat. An hlawhman a mal tikah an insang, nupi fanau an zoh duh vekin an zoh theih lo tikah an kiangkap ah (an bangpi) an rualpi pawl in motor thatha, inn thatha, thawn an nupi fanau nuamnung zetin an ret lai ah harsa zetin an nun tikah beidawng in sumpai hawl in pawnlamah an suak ih an pastor hnatuan an bansan theu.  

Theihtha:

Pastor: Sumpai lam budget tuahtha tha zetin pastor pawlin zir le theih, hman, nunpi thiam a thupi.

Mipi: Pastor pawlin an thlahlawh lawng si loin sungtel pawlin pastor te tulsam mi bawmbawi in ziangtin anmah le dinhmun thawn mil aw mi, an tuanman an ngah ding peksuah thiam ding asi. Thenhra thenkhat (1/10) cu Bible sungah puithiam pawl ei ding ti a rak sin an santhar san ah 1/10 cu puithiam pawl pek asi nawn lo tikah pastor hi farah ding, har tuar ter ding tiah ruah ding asi lo. An tuanman cu ei dingin Bible in a simmi asi sawn. 

6.     Thinhengnak (Anger)

            America ramah kumtin te biak inn (kawhhran) thar 4,000 dinsuah asi lai ah biak inn 7,000 khar asi. Biak inn sungah sungtel pawl an khawm mal deuhdeuh, an phunzai, sawiselnak a tam sinsin, hlawhman a mal, tvp, in kawhhran sung buainak ruangah thinheng hngirteu in pastor tampi an um. Cutin pastor lungawi lonak cun kawhhran member pawl lakah meisa kang vekin a karhzai vivo. Netnak ah pastor tampi in an hnatuan an cawlhsan.  

Theihtha:

Pastor: Satan hmanrua tha bik pakhat cu zumtu pawl “Bawipa ah kan lungawinak” siatsuah asi. Ziangah tile “Bawipa ah kan lungawinak cu kan cahnak asi.” Thlaici forh dingin le tidai tawih dingin lo lakah a vaktu cu milai sihman sehla a keuh tertu le thangtertu cu Pathian asi.

Mipi: Pastor pawl thinhengnak tuahtu si hi nuntawinak, siat tawnnak asi. Na umnak kawhhran ah siseh khui tawk hmun khalah pastor pawl thinheng nak tuah tahratin satan hnatuanpi na si ding maw, Pathian siahhlawh pawl bawmtu tha si in Pathian hmanrua na si ding maw, hril ding na nei.  

7.     Cau-rau (Burnout)

            100 ah 90 (90%) pastor pawl hi zarhkhat sungah nahzi 55-75 hna an tuan. Sunzan, zingsim, zarhtawp (weekend) ti um loin biak inn sung hantuan lawng si loin inn tin mina damlo, sizung, thawng inn, accident nak hmun siseh member pawlih an sawr, an ko, an fial, anmah te hnatuan ding an hawl ih an tuan thei nawn lo tiang in nitin an tikcu can, an thazang le ruahnak cem ko hna an tuan. A ngaingai ah Pastor pawl cu hahdam zetin cawlh hahdam, thuruat, Bible zir, Pathian pawlkom awknak nei ding an sisawn.  

Theihtha:

Pastor: kawhhran deacon pawl liangparah welfare hnatuan tampi hngat thei dingin tuah ding asi. Pastor lawnglawng in ziangkim tuan theh ding asi lo. Kawhhran upa/deacon pawl in kawhhran member pawl zoh, kilkhawi, bawmbawi, sawn ding an si. Cutin an hnatuan tuan suak thei dingin zirh, kaihhruai ding an si.

Mipi: Pastor in Pathian tuanvo pek vekin an hnatuan, thuthangtha simsuah le an nunah nunpi thei dingin thildang hnatuan phut ding an silo. Anmahte hahdam zet in thinlung dai zet in Pathian Thlarau kaihhruainak in an nung ih an lungsungah Pathian fial vekin thildang (social) hnatuan khal tuan ding an si sawn. Pastor parah thuneihnak nei in siseh phutmi nei in uktu vekin phurrit pek ding asilo. 

8.     Taksa harhdamnak (Physical Health)

            100 ah 75 (75%) pastor pawl hi thinlung bang (stress-related) ruangah dam lonak an nei (an rawngbawl sung can khatkhat ah) ti asi. Pastor hrekkhat cu hnatuan ah an buai tuk tikah an taksa thaten an kilkhawi lo. Ei in an fimkhur lo. Cawlh hahdamnak can tha an hmang lo. Exercise an tuah lo.  

Theihtha:

Pastor: Thinlung, taksa, thlarau hardam nak hrangah pastor pawlin tuah hrimhrim dingmi asi. Harhdam zetin kum saupi Pathian rian thei dingin minung lam in tuah thei mi, lehnak, ei in, exercise, tuah in kilkhawi awk ding asi (Pastor pohpoh pum dur ding ti ah Bible in in zirh lo J )

Mipi: Pastor pawl thinlung bang dingin siseh an harhdamnak tiang siatsuah ding khawp in an rawngbawlnak ah hna an tuan maw, an kiangkap thu buai a um maw, sawlselnak, dodalnak a um maw, tvp zoh in bawmbawi ding kan si sawn. Pastor hrang ah phurrit petu si hlah uhsi.  

9.     Insang (Marriage/Family Problems)

            100 ah 80 (80%) pastor pawlin an rawngbawlnak ruangah a sezawngin an inn sangah harsatnak an tawn phah asi tiah an ruat. Biak inn sung, kawhhran hnatuan hi thupi bik ah an ret ih insang cu ngaihsak loin an um tikah insang buainak an tawn phah theu. Nupa, insang hi a thupibikah ret ding asi. Insang siat ding khawp in Pathian in zohman rawngbawl a fial dah lo, nupi pasal nei lo lawlaw an sile thuhran. Cuhnakin insang zohdan, kilkhawi danah zohthim tlak sawn ding asi. Pastor pakkhat in a nupi a pehtlaih nak hnakih thupi sawn leitlun ah milai pehtlaih mi a nei lo. Nupi fanau kilkhawi pehtlaih nak ah a thupi bikah ret ding asi. 

Theihtha:

Pastor: Pathian in insang, nupi fanau a lo pek ahcun cumi siat ding khawp in Pathian in hnatuan a lo fial dah lo ding. A thupi bik sawn cu insang pa, Pathian aiawh in nangmai insang cu duhdawtnak luangliam thawn kilkhawi le nawmpi ding sawn asi.

Mipi: Pastor insang hi ziangtin kan bawm thei ding, an harsatnak ah dinpi in, an nupi fanau pawl tla ulenau vekin zoh ih an harsatnak ah bawmtu tha si thei zuam ding kan si. Pastor insang, nupi le fanau pawl hi dodal, zoh tleu ding an si lo. Pathian nan duhdawrtnak cu Pathian in amai aiawh in kawhhran ah riantu a siahhlawh a retmi pawl nan duhdawtnak in langter ding asi. Pastor hnen ihsin ngahnak lawng duh in a nupi le fanau duhdawt lo asile thiltha asilo, Bible kalh asi.

10.                        Buai tuk (Too Busy/Driven) 

            100 ah 90 (90%) pastor pawl hi an hnatuan dingmi tiah an ruahmi fel famkim zetin a tuan thei lo lawnglawng an si. An hnatuan kaihmi kilkip ah famkim zetin tuan dignah zirnak an tlasam ringring. Buai tuk ringring (busy) hi thiltha asilo. Cuhnakin thinlung le taksa hahdam zetin ziangkim Pathian hmai ah thu bur hmaisa hnu ah ciamciam ten hnatuan ding asi.

Theihtha:

Pastor: buai tuk (busy) nak in thil tampi a siatsuah sawn theu. Curuangah “No” ti zir a tul. Mipi pawl phutmi pohpoh “e law” ti ding asilo. Pathian thu sawn ah dingzetin din ding asi. A thupi khaikhawm thiam (prioritized) tuah thiam in nepnawi ah buai rero ding asilo.

Mipi: Pastor pawl tuah dingmi parah zohman in thuneihnak an neilo, Pathian lawng in thuneihnak a nei. Pastor in a tuah dingmi a tuah lo ih daithlang in a to men, a vaktawi men asile, mipi pawl in dan hmuhdan tangdor nak thawn sim a thiang. Asinan pastor phurrit pe tahratin himi kha mi tuah aw, tiah pastor hi uk ding asilo. Hahdam zetin thinlung dai ten Pathian thawn pawlkom awknak tikcu hmangin Thlarau Thianghlim in a fial le kaihruai vekin tuu rual khal ding an si.

Letu le Post rihli By Hre Mang