KUMTHAR SERMON,

Thupi : Thim  Lakah Suk Awla,  Bawipai Kut Va Kaihnget Aw King George V1                           ( Bible hril mi: Joshua 3:4 )

* Suahsempi Laimi unau zate hnenih kumthar cibai hlannak Sermon

Timlamtu B. Lal Lian Thang

              Sermon thupi pakhatnak :TUKSUMZA  UKNAK  KHAWTHIM : Ralpi veikhatnak (1914-1918) ah khan ralkap milion 9, misenpi milion 13 an thi ih, boruaksia le rilrawng in milai milion 20 an rak thi dah ruangah  Leitlunpi hi mitthli le thisen thawn a rak rum hluahhlo dah.

           Ralpi dang suak thei nawn lo dingin US President Woodraw  Wilson Khan Policy hngetkhoh zet a rak duangsuak nan, khaisan US ramkheldan kha tuisan India-ramih ‘party politics’ an tivek hi a rak si ve ih Woodraw Wilson kha an rak thlak ve ruangah ralpi pakhat hnu kum 20-nakah Ralpi veihnihnak a thawksal mai.

       Ralpi hmaisa hna ih tam sawn, ralkap milion 17 le milai milion 20 hnak ih tam sawn an thi ding ti kha an ruat-ban lo ding ih Judah miphun milion 6 ih tuardan ding tuksumza kha zo hmanin an ttuat cia thei lo ding.

         Adolf Hitler ( 1889-1945 ) kha Dictator a hung si cun, Poland ram a nuai cih mai,Kumpinu (Britian) ram lamah a lu a her cih lala tikah Leitlun mipi cun 1940 ah hin ziang kan tawngsal pei maw tiah an khurh in an rak khur thlohthlo a si kha.

                               Siangpahrang Edward VIII, nuthlawi ngaizawng ih thla 10 lawng lalpa khan, Dec, 1936 ah  a lal tohkham tlansan tahratin,a unaupa George VI ( Lalnu Elizabeth-11-nak ih a pa ) kha kum 3 lawng a lal man ti zawngah khai  san khaw-thim bik  caan kha a rak tawng ta riai a si kha.

                  Ram Ni tla dah lo ih roreltu lu bik a si vekin 1939 Decamber 31 zanah khan  Kumpinui uknak ram hmuahhmuahah hi tin thucah ropi a puang ta riai, “  Kulh ropi sangkakiltu hnenah cun, ‘ meifar in pe aw, ka fehnak ding hi a thim tuk ih hleiah ka feh dahnak zin a si fawn lo’’ ti-in. Anih cun,’’ thimah khan ralttha zetin suk mai aw la, Bawipai kut kha kaihnget aw, cumi cu na hrangah meifar hnakin a tleu sawn ding ih na feh ttheunak lamzin hnakin a him sawn ding,’ tiin i sang “ ti hi a si.

              Kumpinui a uk mi ram hmuahhmuah in Pathian hnenah a nasa thei bikih thla an rak cam ruangah Pathian in nehnak a rak pe hai dah ti thu hi theih a va nuam lawmmam so.

            Ralpi tuar natdan a fiangter zettu cu nauhak unautei pahnih ttawngkam khalah a fiang nasa ih Leitlunpi hin tu tiangah a hngilh dah lo; doawknak kha a rak rapthlak tuk ruangah England khawpi ih nu le pa tampi cun an falepawl an rak tlansan hai.

          Unau 2 te khal cu nu le pa in an tlansan ve hai ruangah,” A naunute cun, ka u khuilam so maw kan pan ding tiah a sut, a upate khal cun, ka naute aw, kei khalin kan fehnak ding hi ka thei ve lo; hmansehla phang hlah aw, Jesun in hruai ko ding ti cu ka fiang” tiah a sang ti a si.

             Cuticun Ralpi 2-nak hin kum 6 hrawng  a awh ih, 1945 May thla ih German a sun ruangah Hitler khal mi-thla hloh in a hlocih ve.  1945 August 6 ah Hiroshima le Nakasaki ah AtomBomb an thlak ihsin Japan khal a sungcih ve ih Ralpi 2-nak kha a rak cem dah.

    Pahnihnak : TUKSUMZA  FIMNAK  LE  ZIRNAK  KHAWTHIM:

                         Khristian-lem le deupawl hi Sun khawthim thlengtertu an ttihnung bik an si.

               Hi tluk khawthim ttihnung rapthlak le tuksumza thisen a luannak  san cu Pathian thutak theifiang lo mifimthiam kan ti mipawl hi an rak si. ( A ): KARL  MARX ( 1818- 1883 )

                       Hipa hi Judah puithiam hrin sungkua ihsin German-ramih vai, a hmin menih khristian kohhran pehzawm ve menmen tei fapa a si; khristian thurin laimu kaiban riai si loin, khristian hmaisapawlih an neih mi ziangkim siang zetih an rak ttawmawk vek kha tharthawh ciamco tum tahratin, mipi nuntlangdan ding ih socialism ti mi hi a rak duangsuak ngelcel pantehmaw!

         Pathian thutak kiangte ih feh vek si, thutak kaiban si lo, khristian principal thei ngaingai fawn lopawlih philosophy  hi a si, thim khawzing rapthlak bik communist party a hung suahnak hrampi cu!

( B ):JOSEPH  STALIN ( 1879-1953 )

                  Hipa khal hi khristian innsang ihsi seilian, thutak kaiban si lo, Pathian le be-pawp fawn lo, Tiflis Orthodox Theological Seminary ihsi an dawisuah hnuah Russian Revolution ( 1917 ) le Civil War ih mawhphurtu luban pakhatah a cang ta riai aw!. Lenin a thih ( 1924 ) hnuah Comunist Marxist huaitu a si.

                   Stalin ih luarkaidan maksakzia cu Communism hi ramkhelhnak lawngah hmang loin sakhua / biaknak roriah hmang tahratin Pathian a um lo ti rori in a zirh. Russia-ramih Orthodox kohhran ropi tak khal a do nasa tuk ih khristian tampi a rak that hluahhlo mai.

                    Cuitlunah khristian cabu ttha tam zet ngantu Leitlun pumhuap ih hminthang Tolstoy ( 1825-1910 ) kut suakpawl le Bible si seh khristian calai hmuahhmuah cu  a rak nuai-hlo nasa;  hmansehla kum 70 a rei hnu cun USSR President netabik Mikhail Gorbachev khan ralttha zetin December, ni 25, 1991 ( Khrismas ni ) bak ih  bannak thu a rak puan ihsi cun USSR  kha an tthendarhaw thluh ih Russia-ram Communist Party  cu a hlo vuarvi .

( C ) MOS  TSE  TUNG ( 1893-1976 )

              Hipa khal hin Tulukramah Communist Party lole thim-khawzing party hi a rak din ve ih, anih hi cu kan Kawlram kiangte a si ruangah rel tam ttul lo ih a thuhla kan theih cia ttheh mi a si pam; amah ruangah Tuluk-ram khristianpawl hin tui ni tiang hremnak a phunphun an tuar ih  an thih tamzia hi a rapthlak tuk aw!.

                  Hmansehla Leitlun ih khristian tthangcahnak bik ram cu Tuluk hi a si  ih , hi ram zumtupawlih lungput le Gospel an fehpitdan ( method ) hi ramdang zumtupawl khal hin cawng thei ciau nungna a va duh um so. Aizawlih hung tlawng Mr. Wang thlacamdan kha ka hngilh thei hrimhrim lo; Bible an zem ruangah an rualnu an that ih, Cumicu Mr. Wang hin, “ Bawipa keikhal i duhdawt a si ah cun in martar-tir ve aw “ ti rori in thla a cam ve a si.

          Tulai crusade ka ( n ) tuah tipawlih kan ttul bik mi rawngbawldan cu CRUSADE lungput si loin CRUCIFIED lungput hi si thei hram sehla a va duhum so.

           Crusade hi cu Mirangih COERSIVE an ti mi hlanlai RCM-pawlin zaangtalih Pathian ram an rak nawr vek kha kan hluan tuk thlang a bang; curuangah a si, tulai Aizawl news-pawlih “ Mizo hi ringtu depde tak kan si, awlsam takih piangthar le awlsam takih da-sal hnam kan si” ti ih an ngan ciamconaksan hi a si ding.

                           Kannih Mizoram  zumtupawl  Sunday zingtin  bingba-lailet ih lam ciamco le Zion Rock N Roll ih sawp-aw dohdo phah ih ttawnghriat lo hla sapawl hi tubai tla cun India-ram pum State tinkim  nauhak lak ih rittheinak ( drugs ) titu tam bik State kan si lala fawn ih a va mangbang thlak tak em!

              Kan Mizoram hin sual lam pan ihih a luarkai deuhdeuh mi hi Mizoram khristian HRUAITUPAWL hin Kawlram le Tulukram khristian hruaitupawl kan tluk lo tuk ruangah a si ti mi Mr. Sangzela pawlin Kawlram an tlawn hnuih an hmuhdan hi an relsual tam lem lo ding a zumum.

                Tubaite Aizawl ih nunau le nunau neiaw tla kha a mipa sawn ih ttang riangri kha rin lo zetih fa a vun tikah a hringtu nu le pa in, “ Kan fapa in fa a vun” ta riai ih tiah an va hruai; cutikah fa vuntu ih nupi cun,  E-khai nan hruai lamlam lo pei, keimah hman fa ka vun thei hrih lo tinak laiah kan pa ih fa a vun cu ka lung a awi tuk lo maw, nan hruai thei lo” tiah a rak el ttohtto hai!

                 Hivek  sual hi Aizawl ah cun a tam tuk thlang nan, Pathian hnattuantupawl hin an va pan hai lem lo; hruaitupawl hin, “  A duhtu hmuah cun kan center ah in ra pan thei “ ti ih sign board tar cu an um huaihni.

       

Pathumnak : NORTH  KOREA,  ROMANIA   &  MUSLIM  RAMPAWL:

               Ukawknak thim-khawzing ram tam zet an um lai hrih. Muslim rampawl le North Korea si seh Romania tipawlih khristian an hrem natsatdan, an tiduhdahdan rapthlakzia cu Leitlun thuthangca tampi ah siar theih dingin an suah hrim ringring a si hi.

              Ahleicein hi rampawl hi thimkhawzing ih a uk pumhlum mi ram an si ruangah khristianpawl hi nung cingin meisa in an ur-that hai, an hngawng an tan hai, zumtu fala an kaihrem hrim hai, zumtupawl  anmai thlan an laiter hai hnu ah nung cingin an phum hrim hai ti a si ringring lai ko.

      Palitnak :   THIM-KHAWZING    IHSIN  TLEUNAK  ZINIH  HRUAITU  AU-AW

           ( Leitlunih  ttawngkam  mawibik  pakhat an ti mi cu )

             North Africa Thagaste ( tulai ih Algeria) ih khristian nupi tthatthum Monica thuanthu hi kan hngilh thei ciau lo ding; a pasal cu zumlotu a si ih hleiah mi-thinsia zet le mumal lo tak ,a hminah Patrik ti a si.

             Hmansehla, hi nupi tthatthum hin an fapa sual zet Augustine ( 354-431 ) hrangah catbang loih  thla a camsak kha a rak sunzawm ringring  ruangah  a fapa cu Khrih hnenah a hruai thei a si kha.

           Augustine hi kohhran ban-hnget, “ Doctor of the Church “ ti tiangih Tleunak lamzin simtu  cu a nu Monica khristian nupi tthatthum kha a si.

             England-ram ih Latin khristian-pawl hgnettertu, Missionary lungput nei, Barbarian mi tampi khal Khrih hnenih hruai theitu, Catebury ih Bishop hmaisabik Augustine (~604AD ) kha Italy, France le Leitlun hmun tampi a tlawn hnuah mi-tampi in, “ Leitlunih na thil hmuh mi hmuahhmuah lakah  ziang si ropi bik ih na theih “ tiah an sut ih, anih cun,” Khrih ih a ukneh mi innsang” tiah a sang hai.

      MI-AA-PAWL  HRUAINAK ( Society )  TANGAIH  THIM  RAPTHLAK

                Augustine in Khrih hnenih a hruaimi Barbarian-pawlih an thuanthu khi malten rel duak sehla. Rom in Leitlunpi kum 1000 sung rori a uk lai khalah, Mediteranian tipi kiangkap ih khawsapawl kha an si ih, Kawl ttawng cun ‘ Lu-zaing’ an ti mi, sa-hring-ei, tidai khal khawlh dah lo an si ruangah Greek-pawl cun, “ Milai cu sisi, ramsa thinlung an keng fawn ruangah Barbarian tiah hmin an rak phuahsak hai.

              Barbarian-pawlih hmel siatdan rapthlakzia cu , hmuh pangah cun mangsiat rorinak a si an ti. Zawng tumpipi vek, a rapthlakzawng tuk khi an hmel pianttodan cu sikhawh, an hmel veikhat hmu-ngah pangtu cun  hmuhsal an hiar lo nasa ti a si.

                Thal kah hi an thiam tuk lawmmam ih, ziangvek lam hlapi khalah an tumtah hi cu an tthelh lo lawlaw; ral an do tik khalah an pacangpawl hin an nupi le hi an Rang dunglamah an toter ve hai ih, hnipuan hruk ti khal um lem lo pan cu, tawlawng khalin an nupipawl cu Rang todan khal an thiam nasa; an nupinupawl cu sam sau zet cingin tidai khawlh dah lo ti tafam cu an lu rim siatdan le sahring ei cing ih kam tthuah dah lo an si ruangah an ka-rim / thaw-rim siatdan hi cu lamhla zet khalin luak a suak ur-o thei ti a si.

       France lal sungkua an thahdan rapthlakzia tla kha, an thahdan thuanthu hi veikhat siar hnu cun, siarsal khal a paih um nawn lo ti ciau a si; Barbarian-pawl hnenah France lal sungkua hin an nunnak zuahsak hramhram dingin an fanu lasi fala hmelttha cungcuang vek thawi an tahtthim mi cun khukbil-in zangfah a dil nasa tuk hai nan,amah lawng Barbarian lalpa nupi dingih an duh ruangah an zuah ih, cu lopawl hmuah cu nung cingin an sa an can hluahhlo hai men.

        Cutlukih fala hmelttha, Van arsi le thlapi vekih no hnialhni an ti mi cu Barbarian lalpai a ihpit ding zan ah cun Barnarian-pawl hi ral an neh tikih an lawmdan ah hin an ril le pumpi ih tuar thei lo tiangin luak phah rero cing le ek khal thlau phah cing tiangih sa ei zuamawk tivek kha an rak hman ruangah, khai an lalpa kha sa a ei tamtuk ruangah fala hmelttha kha a ihpi thei nawn ta lo.

        A thaizing an lalpa thawh tikcu a luan tuk hnu khalih an thawh nawn lo ruangah sangka an bal ih fala hmelttha cun thinphang le khur thluahthlo cingtei sangka a awn hai tikah an lalpa cu sa a ei tam tuk ruangah a thi ti kha an theithiam ve lohli.

               Hivek sahrang  thinlungpu Barbarian-pawl hin Rom rampi rori kha ni nikhat ah an rak neh thei a si kha; mangbangza a si! Khaisan ih Rom Engineer-pawl khan Key-board tuah hman an rak thiam tuk zo ih, khristian-pawl sahrang an rak keuter laifangah key-board tum phahin an rak hawhaw durdo hai ti a si .

                 Cuticun khaisan Rom pacangpawlih thinlung luahkhattu bik cu, “ Sui a tam thei bik ih neih an duh ciau” tiah thuanthu thiampawl cun an hminsin bangtukin Rom mipi thinlung kha Leitlun thilin ei-se thluh khawh, an thinlung ( moral ) kha a siatbal ( corrupted) tuk hnu cun tisa hiarnak sualah an sawprawp ttheh viar aw!

         A rapthlakzia cu an Siangpahrang Claudius ih nupi Agrippinas tla kha cu, zanlai ah lal innpi suahsan in hlawhhlangpawl hnenah nuam a va tawl ciamco ih zinglam khawvang hlan deuh hrawngin lal innpi a pansal ttheu tiah thuanthuthiam Juvenal cun a ngan.

         Cuticun hnamcawm Barbarian-pawl cun Rom-rampi an rak neh ruangah Leitlun pi hi  sahrang vek MI-AA-PAWLIH  UK  LE  HRUAINAK   ( Society ) hnuaiah caan reipi a rak rum hluahhlo dah a si.

          “ Kulh ropi sangkakiltu hnenah cun Meifar in pe aw, ka fehnak ding lamzin a thim tuk, ka feh dah lonak zin a si fawn” tiin. Cule anih cun, thimah khan ralttha zetin suk mai awla, Bawipai kut va kaihnget aw, cumicu Meifar hnakin a tleu sawn dingih na feh ttheunak lamzin hnakin a him sawn mi a si ding tiah i sang “----  King George V1. ## 

           Laicin sempi Laimi unau zate hnenah thlacamsaknak thawnkumthar cibai ka hlan.