LOTHLO PUTAR PA LE KHAWSIA PUTAR

LOTHLO PUTAR PA LE KHAWSIA PUTAR

Van Thawng Thang

BYC khawm zan sermon ih tahthimnak
 pek mi,Tahan BPC Biak inn ah

Veikhat cu Khawsia putar pakhat hi Leitlun ih Minung pawl thinnuam le hnangam zetih an um kha a hmuh tikah a iksik(nahsik) in a thin a heng tuk.

Rem-aw zetih a ummi minung pawl hi ka va buai ter ta ding. Cu ti asilole Khawsia ka si man a um lo ding ti-ah a ti. Cuti’n Khawsia te pakhat a ko ih lothlopa va buai ter dingin a fial. Cui lothlopa cu nitin harsa zetih lo thlo ringringtu a si. Khawsiapa cun cui’ lothlopa cu hnaihnok a thok. Lothlopa lei a let zik caanah leilung hak dingin a rak tuah sak. Lothlopa cun harsa takin lei a let hnut-hno rero nan zianghman phunzai lo te’n a ṭheh tiang a ṭuan thei. Khawsia fate pakhat cun ka buaiter tumnak ah ka hlawhsam a si a ti-ih a tlunsan men.

Khawsia putar cun a pahnihnak khawsia fate a thlah sal. A pahnihnak khawsia cun hi lothlopa hi ziangtluk harsa dingih tuah khalle phunzai lo te’n nun nuam takin a nunnak a hmang thei. Hi pa hi harsa dingih tuah loin a rawl ei ding ka rak ruk sak sawn ding ti-ah a ruat. Cule lothlopa ih ei dingmi rawl zate’n a rak ei sak thluh. Lothlopa cu bang hniap-hniap le rilrawng takin lo ihsin a ra tlung. Ei ding zianghman a hmu nawn lo.

“Aw… Khuilam ih um, mi zaangfah um za saw a si! Kei hnakih ṭul sawn le rilrawng sawn an um a si hi! Khai rawl pawl thawn puar ko seh,” ti-ah zaangfahnak thinlung thawn thlawsuah a pek bet.

Lothlopa siat ter thei dan lamzin a um nawn lo mawsi ti-ah Khawsia putar cu a mang a bang hluahhlo. A pathumnak khawsia pakhat cun keimah in Lothlopa siatsuah dan ka thei ding ti-ah Khawsia putar hnenah cun a ti.

A pathumnak khawsia cun lothlopa thawn rualpi ṭha si dingah a zuam hmaisa. An rualṭhat-awk ngah hnu-in hmailam thu rak simcia theitu khawsia te cun lothlopa ih hnenah, “hmaikum khi khua a keng ding (ruah a mal ding). Curuangah tidai pawl rak khawl cia-aw,” ti-ah a fial. A fial vek cun Lothlopa cun a tuahih midang pawl hnakin fang a vui tam sawn. Cui Khawsiapa cun ziangvek a cing ding, ziang a tuah ding tivek thurawnnak(Advice) a pe ringring.

Cuti’n kum thum a rei hnu-ah Lothlopa cu milian takah a ra cang. Khawsiapa cun fang ihsin zu suandan a zirhih a zuar ter. Paisa tam zet a ngah vivo tikah lothlopa cun a lo hna cu tan sanin sumdawn a thok.

Lothlopa cu sumpai tamzet a neih vete’n, ei le in lam khalah a duh thaw nasa thlang. Zan tin a rualpi pawl thawn nuam an cen ringring. Zaan khat cu Lothlopa ih inn ah rawlei puai an tuah. Khawsia fate cun Khawsia putar cu a ko ih,
“Khah, zoh-aw. Buai dingih ka tawlrelmi lothlopa khi ziangtlukin ka siatsuah thei zo ti ka lo hmuh ding,” ti-ah a ti. Zaanriah ei khawmnak puai ahcun lothlopa cun a rualpi milian dangdang sawmin, a thawbikmi rawl, a ṭhabikmi zu pawl a do hai. Zu le Sa cu khopkham takin an cen nasa.

Cui’ caanah zu-khuat(no) kengih ding rerotu a tirhfung (hnaṭuantu) pakhat rin lo pi’n a tlu. A bang tuk le a rilrawng tuk ruangih tlu a si. Lothlopa cun hi zaankhat men hman rawl mi pe thei lo ti-ah kawkin a hro ciamco bet.

“Lothlopa hnenah duhdawtnak, zaangfahnak, lainatnak timi a um nawn lo,” ti-ah khawsia fate cun a ti.
Cu tikah khawsia putar cun, “Ziangti’n saw na ti thei?” ti-ah lungawi zetin a sut.
“A ṭulmi hnakih tam sawm ka pek. Cu lawngah a neihciami a mizia diktak; duhamnak, hngalnak pawl ka phorh suak thei a si,” ti-ah a sawn.

Thinlung a thleng-awk cun ruahnak khal a thleng-aw ve.
Ruahnak a thleng-awk cun umdan khal a thleng-aw ve.
Um dan a thleng-awk cun mizia khal a thleng-aw cih ve.

Hminsin : Leo Tolstoy ih ca a remcang danih leh mi a si