KHUR

     Van Thawng Thang

Mi zawn le an ruat lo; Anmai’ san lai-ah hmuah an duhduh in an nung si, 

A ca ngan lai

Kanmai’ san le hiti’n um hlah, kha ti’n um hlah! Hi ti sawnin um aw… Himi na tuah le a sual, Hi lawmman ih mi zawn ruat thiam lo UPA pawl cu!!!

“Tuvek kum ah fala/tlangval neih ding a si lo maw” Anmah laiah hmuah an nei si; Kannih hmuah nei hlah uh in ti.  “Ze hlah uh, nan zet le mi nan bang lo ding,” Anmah hman kanmah hri-hrual an si laiah rak ze emem si-in. Si lo maw? “Paisa khawl uh, hmang rero hlah uh,” Thu ih rel cu an thiam nasa. Anmah san laiah rak khawl loih an duhduh ih an rak hmang ruangah tuvek dinhmun kan thleng a si lo maw?

“Ka fa, zu in hlah aw,” Amai’ kaa ah hmuah zu rim nam pi thawn. Kannih nun in ra sim ve sapbei. “Kuak fawh hi a ttha lo,” Amai’ zal ah hmuah kuakbawm hun um rori ah. Kuak ih ṭhatlonak mi a ra sim ngam bep lai. Hnihsuak menin!!! “Falat-tlangval nak ah ralring uh,” Upa pawl in mi an ra sim lailai. Anmah hman fa sawn nei cingin. Nunsimnak hi khatlam lawng zohin an rel ṭheu. Mi zawn ruahnak hi fate hman an nei lo lawlaw. Anmah hmuah an duhduh in an san laiah an rak um ih kannih hmuah tuah in siang lo. Hi hi cu thil dik a si lo rengreng.

Hi ruahnak hrangah thilcang pakhat a rak um dah.

…

Khuahlan laiah, Sui-khur a um tiih a hminthang zetmi khua pakhat a um. Cui’ hmun ahcun suikhur hawl rerotu mi tamzet an um. Ni khat cu ruahpi le thlisia nasa tukin a hrang ciamco. Cu tiih ruah a sur ciamco tikah tiva pawl khal nasa takin an luang huiho ih an khua ihsin hmun hla ve nawn pakhat ah Tikhur hlun pakhat a ra lang. Cui’ tikhur kap ahcun mi tamzet an fehih a parin an zoh vialvial.

“Ee… khi tikhur sungih ti serso teih tleu rero pawl khi sui an si ko ding,”
“Si lo; lungmankhung pawl an si sawn ding,”
“Kei cu Diamond a si ka zum,”
“Si lo, hlan laiih sui an thupnak khur a si ko ding,”
“Kan hawl reromi Suikhur cu kan hmu zo,”
ti-ah zoh phahin an ṭong celcel.

An zate’n duhhamnak mit an meng thluh lo maw?

Culai ah mi pakhat in ka va dawp ding tiah a ti. “Hey, dawp hlah. Keimah si hmu hmaisabik; ka ṭum hmaisa ding. Keimah si thleng hmaisa sawn.” “Lamlam, keimah si thleng hmai sawn, kei ka ṭum hmaisabik a ṭul,” “Keimah si thleng hmaisabik,” ti-ah an el-aw celcel hai.

Culai ahcun mipakhat hi ziang awn-ai lo te’n cui’ tikhur ahcun a dawp vukvi-ih a zaangpathal in a hnuai-ah a tla puppi. A vun rem-aw thluhih a zoh cu… sui le ngun pawlih a ruatmi pawl cu an rak si lo nasa; sui khal a um lo, ngun khal a um lo, diamond khal a um lo, lungmankhung pawl khal pakhat hman a rak um lo. A hmuhmi cu,… ruah nasa takih a sur ruangah lei a minih khur sungih a rak ummi rul tam zetih mit tleu khi a rak si sawn. Cu vete’n cu pa cun duhsaknak thinlung thawn, “Zohman ra ṭum bet hlah uh. Sui le lungmankhung ih kan ruatmi pawl kha an rak si lo: Rul tamzet ih mit tleu sawn a si. Kei cu ka ra kai thei lo ding ruangah hi tin ka tuar mai ding,” ti-ah a hei auh hai.

A parih um pawl cun cu pai’ ṭongmi cu an zum lo lawlaw. Amah lawngih a duh ruangah hi ti’n in ti a si ko ding ti-ah a dang pakhat a va dawp sal.

Cu pa khal cun, “Thungai si. Zohman ra ṭum hlah uh. A relmi kha a dik sokhaw. Tu anih cu an cuk that zo. Kei khal ka thi cing ding. Lungmankhung le sui ih kan ruatmi kha rul pawlih mit tleu men a rak singai. Zohman khur sungah ra ṭum bet hrimhrim hlah uh. A ra ṭumṭum nan thi ve si ko,” ti-ah a hei auh sal hai.

Khur lengih a ummi pawl cun a sungih um pahnih in ṭong cu an zum lo. Hi te’i pahnih hi an thluak an hmangih in bum tum men a si ding. Anmah pahnih ih co thluh an duh a si ko ding ti-ah an ti.

Duhhamnak mit hlir-in an meng thlang!!!

Cuti’n…
An zate’n an dawp supso thluh. Khur lengah zohman an tang nawn lo. A sung ahcun an zate’n rul rual cun an rak cuk thah thluh.

Upa pawl cu..

Rul pawlih mit tleu kha “sui” ah rak ruatih, “ngun” ah ruatih, “lungmankhung” pawl ah ruatih khur sungih a rak dawp dahtu pawl vek an si.

Nun in simmi pawl cu, rul in an cukih khur thuk zet sung ihsin an ṭongsuakmi au-aw a si.

Curuangah ra dawp ve hlah uh an ti. Asinan mino pawlin an zum lo. Cule an dawp vivo lai ko ding.

…

Mino le upa ti hi ziangti’n kan simfiang ding. Kei cun hiti’n hrilhfiah ka duh.

Theih lo ruangih an tuah pangmi sual, a dik ti-ah ruatih an tuahmi sual, thil diklo pawl dik sal dingah zuam rero phahih an tuahbet pangmi sual, hi cu a dik a si, hi cu a dik lo a si ti thei nan zianghman danglamnak a um nawn cuang lo ding tiih an ti ṭheumi sual,… cui sual pawl cu an thinlung sungah khum phahin sir-awknak nasa zetih a nung rero tu pawl khi , “UPA” ti’n ka ti.

A dik lomi pawl dik lo takih tuah dingah zuam rerotu pawl asilole tuah rerotu pawl khi “MINO” ti-ah ka ti.

Curuangah..

Sir-awknak thawn, sual a simi an rak tuah pangmi; an nunnak ih an zir suak ngahmi ca pawl, Mino pawl hrangah sual ve lo ding, rak hrial ding, ralring dingih an simmi pawl hi Mino pawl in theihthiam ding a si.

Thungai ahcun,

A tleu zetmi rul pawlih mit pawl cu lungmankhung le sui ah ruatih, ngah duhah a zuam ruangih sunralnak, sir-awknak, mitthli, harsatnak pawl tuar phahih an theihmi upa pawlih nunsimnak hi mino pawlin an theihthiam beiseiin hi thuanthu te hi ka lo hlawm duhnaksan a si.

NA ZUM LOLE KHUR SUNGAH DAWP VE MAI-AW